მთავარი » 2011 » ივლისი » 17 » "ზოგს რუსკა მაყაშვილის და ვგონივარ, ზოგს - ნათესავი"
20:10 "ზოგს რუსკა მაყაშვილის და ვგონივარ, ზოგს - ნათესავი" |
"ზოგს რუსკა მაყაშვილის და ვგონივარ, ზოგს - ნათესავი"
სერიალში "გოგონა გარეუბნიდან" ახალი პერსონაჟი - ირინკა გამოჩნდა და საზოგადოების ყურადღება უმალვე მიიპყრო. ის რუსკა მაყაშვილის გმირის - ანჩოს დის როლს ასრულებს და რუსკას არა მხოლოდ გარეგნულად, მანერებითაც ძალიან ჰგავს. ეს პატარა გოგონა 14 წლის ანი ლებანიძე გახლავთ, ეს კი მისი პირველი ინტერვიუა, რომელიც პირველი როლის გამო შედგა.
 - ანი, როგორ მოხვდი ამ სერიალში?
- სერიალს გამოსვლის დღიდან აქტიურად ვუყურებდი. მე და რუსკა მაყაშვილმა ერთმანეთი ინტერნეტით გავიცანით, ეს მსახიობი ყოველთვის მომწონდა და დავუმეგობრდი. ერთ დღეს მომწერა, რომ კასტინგი ტარდებოდა, "ღამის შოუს" სტუდია მისი დის როლის შემსრულებელს ეძებდა. ტელევიზიაში მამასთან ერთად წავედი და კასტინგი გავიარე.
- ბევრი ბავშვი იყო?
- დიახ, მე ბოლო ვიყავი. იმდენად ვნერვიულობდი, ფეხები მიკანკალებდა, მაგრამ მერე ნერვიულობა მომეხსნა და მგონი, ყველაფერი კარგად გავაკეთე.
- რა დავალება მოგცეს?
- დაწერილი ტექსტი მომცეს, რომელიც რუსკასთან ერთად უნდა მეთქვა. თავიდან თითქოს არ გამომივიდა, ბოლოს უფრო "გავიხსენი". პასუხი არ უთქვამთ, 3-4 დღეში შეგატყობინებთო. ეს საშინელი პერიოდი იყო, ღამე არ მეძინა, მერე რუსკამ მომწერა, დაგამტკიცესო და ოჯახში ყველამ ძალიან გავიხარეთ. მალე პროდიუსერი დამიკავშირდა და მითხრა, ტელევიზიაში როდის უნდა მივსულიყავი, იქ კი პირველი ნიკა წულუკიძე (ერთ-ერთი სცენარისტი) გამესაუბრა. მითხრა, მაწაკი და მავნე გოგოს როლი უნდა შეასრულოო. თან გამამხნევა. ჩემს გმირზე ისე მელაპარაკა, როლის შესრულება გამიადვილა. მინდა, მას ამისთვის მადლობა გადავუხადო.
- გადასაღებ მოედანზე პირველად გახვედი. ალბათ ძალიან ნერვიულობდი...
- ძალიან. ეს წუთები არასდროს დამავიწყდება. იქ რუსკას გარდა არავის ვიცნობდი, მასაც ახლოს - არა. ყველაზე მეტად ტექსტზე ვნერვიულობდი, თან არ მინდოდა, დაძაბულობა შემტყობოდა. ვიცოდი, თავისუფალი და ლაღი უნდა ვყოფილიყავი. გადაღება დაიწყო, როლში შევედი და უცბად, გონება გამეთიშა - აღარ ვიცოდი, რა უნდა მეთქვა, დავიბენი და ჩემთვის ჩავილაპარაკე - "დამავიწყდა". ყველამ სიცილი დაიწყო. არა უშავს, თავიდან გადავიღოთო. ისიც კი არ ვიცოდი, დუბლებს თუ იღებდნენ. გადაღება რომ დავასრულეთ, რუსკამ კიბეზე ტაშით ჩამომაცილა, ძალიან კარგი იყოო.
- შემოქმედებითმა ჯგუფმა როგორ მიგიღო?
- ძალიან თბილად. მათი დიდი ოჯახის წევრი გავხდი და მიხარია. გამოცდილება არ მაქვს, ასაკით პატარა ვარ, მაგრამ რეჟისორები სცენარისტები, მსახიობები მხარში მიდგანან...
- მსახიობები პროფესიულ რჩევებს გაძლევენ?
- რა თქმა უნდა. რუსკა, თინა მახარაძე და მამუკა მუმლაძე ხშირად მელაპარაკებიან, მათ რჩევებს ჩემთვის დიდი მნიშვნელობა აქვს და ვითვალისწინებ.
- ანჩოს მიმიკებზე ბევრი იმუშავე?
- არა, როცა ვიცი, რომ მე იმ წუთში ანა კი არა, ანჩოს და ვარ, ეს ყველაფერი თავისით მოდის, რუსკა მახსენდება და ვაკეთებ, მაგრამ მინდა, საზოგადოებამ გამიცნოს, როგორც ანი ლებანიძე და არა - როგორც რუსკას ორეული.
- ფილმში შენი პირველი პარტნიორი ვინ იყო?
- რუსკა. სცენარის მიხედვით, ჩვენი მშობლები საზღვარგარეთ წავიდნენ და მე ანჩოს იმედად დამტოვეს.
- რა შეცვალა ამ სერიალმა შენს ცხოვრებაში?
- ბევრი რამ. ახალი მეგობრები შევიძინე. სერიალი პარასკევს გავიდა, ორშაბათს სკოლაში რომ მივედი, ყველა მეუბნებოდა, კარგად თამაშობ, ძალიან მოგვეწონეო. ზოგს რუსკა მაყაშვილის და ვგონივარ, ზოგს - ნათესავი.
- არც არის გასაკვირი, მას მართლა ძალიან ჰგავხარ.
- ეს პირველად ჩემმა დამ აღმოაჩინა. "გოგონა გარეუბნიდან" რომ დაიწყო, პირველი სერიის გასვლისთანავე მითხრა, ანჩოს გამსგავსებო. მერე, როცა ეს სერიალი პოპულარული გახდა, ჩვენ შორის მსგავსება სხვებმაც დაინახეს.
- სინამდვილეში ერთი და გყავს?
- დიახ, მარი 11 წლისაა, მაგრამ მე სულ არ მგავს.
- შენს პერსონაჟს რით ჰგავხარ?
- ცოტათი ცანცარა ვარ (იცინის), მაგრამ ჩემს დას ირინკასავით არ ვეჩხუბები.
- ირინკა ინტრიგანიც არის.
- არა, ინტრიგანი ნამდვილად არ ვარ.
- მომავალში შენი პერსონაჟისგან რა სიახლეს უნდა ველოდეთ?
- მალე ირინკა შეყვარებული იქნება... სხვას ვერაფერს გეტყვი.
- თეატრალურ წრეზე დადიხარ?
- არა. ცეკვაზე დავდივარ, ანსამბლ "გიორგობაში".
- მომავალი პროფესია არჩეული გაქვს?
- დიდი ხანია, ვამბობ, ექიმი უნდა გამოვიდე-მეთქი. სამედიცინოზე აუცილებლად ჩავაბარებ, მაგრამ ამავე დროს მსახიობობაც მინდა, აქამდე ამაზე დიდად არ ვოცნებობდი, მაგრამ ახლა ეს პროფესიაც მიზიდავს.
- წარმატებებს გისურვებ!
- გმადლობთ.
|
|
კატეგორია: ქართველები |
ნანახია: 1921 |
დაამატა: Sally
| რეიტინგი: 0.0/0 |
კომენტარის დამატება შეუძლიათ მხოლოდ დარეგისტრირებულ მომხმარებლებს [ რეგისტრაცია | შესვლა ] |
Pm ( 
სულ: 756 
თვის განმავლობაში: 0 
საიტის ადმინი: 4 
სერვერის ადმინი: 3
მოდერები: 8
მომხმარებელი: 0 
მნახველი: 737 
ქალი: 653