 ამერიკელი რეპერი, მსახიობი და ტელეწამყვანი, რომელსაც შავ ემინემსაც უწოდებენ ხოლმე, ჩვენი მაყურებლებისთვის უფრო მეტად ცნობილია MTV-ის პროექტით "ავტომარიაჟი", რომელშიც დანგრეულ და ძველ მანქანებს "უმარიაჟებენ" ჩვეულებრივ ადამიანებს.
ალვინ ნატანიელ ჯოინერი, იგივე Xzibit დეტროიტში დაიბადა 1974 წლის 18 სექტემბერს. 9 წლისა იყო, როცა დედამისი გარდაიცვალა. ამას მოჰყვა მამასა და დედინაცვალთან ერთად ნიუ-მექსიკოში გადაბარგება.
ლექსების წერა ათი წლისამ დაიწყო, იმიტომ, რომ რადიო არ ჰქონდა და ვერაფრით ერთობოდა. თვითონ მიაჩნია, რომ შემოქმედებითი ნიჭი და იმპროვიზატორის გენები დედისგან აქვს მემკვიდრეობით, რომელიც მწერალი იყო.
დამწყები შემოქმედი ახალ ოჯახსა და გარემოს ძნელად ეგუებოდა. საბოლოოდ სახლიდან გაიქცა სამხრეთ-დასავლეთ შტატებში. მაშინ თოთხმეტი წლის იყო, ცუდ წრეშიც მოხვდა და სამართალდამცველებმა კოლონიაში მიაბრძანეს. 17 წლისა გაათავისუფლეს, პირობით. მიხვდა, რომ ეს არ იყო ის ადგილი, სადაც მომავალშიც სურდა მოხვედრა და კალიფორნიაში გაემგზავრა.
რეპს ათი წლიდან ასრულებდა, ამიტომ იმ მომენტისთვის, როცა რეპით უკვე კალიფორნიელი მსმენელის წინაშე წარდგა, მისი სტილი უკვე კარგად იყო ჩამოყალიბებული. მუსიკალური კარიერა დაიწყო ჯგუფ Likwit Crew-ს შემადგენლობაში, 1992 წელს კი პროდიუსერთან დაიწყო მუშაობა, რომელსაც რამდენიმე შემდგარი მომღერლის წყალობით შეხვდა.
 სადებიუტო ალბომი At the Speed of Life 1996 წელს გამოვიდა, ამას მეორე ალბომიც მოჰყვა, უკვე ცნობილი რეპერების მფარველობით გამოშვებული. სახელი კი ახალმა რეპერმა სახელად Xzibit-მა (ფსევდონიმი აღებულია ინგლისურის ჟარგონული სიტყვიდან Exhipit, რაც ექსპონატს ნიშნავს) კომპოზიცია Bitch Please-ით გაითქვა, რომელიც სნუპ დოგთან ერთად იმღერა. მოგვიანებით ამას კიდევ რამდენიმე ალბომი მოჰყვა, რომლებმაც ოქროს სტატუსს მიაღწიეს. როგორც მისი თაყვანისმცემლები ამბობენ, მისი სიმღერები ძალიან რეალისტურია, მათში ჩვეულებრივი შავკანიანი ბიჭებისთვის ახლობელი ბევრი პრობლემაა ასახული, რის გამოც მიაღწია დიდ პოპულარობას. "ბევრი სიბრაზეა ჩემს ნაწარმოებებში, იმიტომ, რომ ცხოვრებაში ბევრი ცუდი რამ მინახავს და გადამიტანია", - ამბობს თავად მომღერალი.
როგორც წესი, ყველა რეპერი მესამე ალბომის გამოშვების შემდეგ საკუთარი ხმის ჩამწერი კომპანიის შექმნაზე ფიქრობს. ამ გზით წავიდა ექზიბიტიც და საკუთარი ლეიბლი ჩამოაყალიბა, სადაც წერს თავის სიმღერებს.
თუმცა გარდა სიმღერისა, მომღერალმა შესანიშნავი ტელეკარიერაც აიწყო. უკვე რა ხანია უდგას სათავეში ტელეშოუს Pimp My Lide ("გამიმარიაჟე მანქანა"), რომელმაც პოპულარობაც მოუტანა, ისე, რომ 2004 წელს MTV-ის დაჯილდოების ცერემონიის წაყვანაც კი ანდეს. ოღონდაც, როგორც თვითონ ამბობს, ტელევიზიამ მისი მთავარი სიყვარული - რეპი და ჰიპ-ჰოპი ვერ ჩაანაცვლა, კვლავაც წერს სიმღერებს და მღერის კიდეც.
გარდა ამისა, მომღერალი ოცზე მეტ ფილმშია გადაღებული, რომელთა შორისაა "8 მილი" და "საიდუმლო მასალები".
რაც შეეხება ქალებს. მომღერალს ბევრი მეგობარი გოგონა ჰყოლია, ოფიციალურად კი არ დაქორწინებულა. ამჟამად მოზრდილი შვილი ჰყავს, რომელთან ერთადაც ჩნდება ხოლმე საზოგადოებაში. 2008 წელს ტრაგედიაც გადაიტანა - ექზიბიტის ახალშობილი ვაჟი ჰავიერ კინგსტონ ჯოინერი გარდაიცვალა. სიკვდილის მიზეზად ბავშვის სუსტი ფილტვები დასახელდა. ამ მოვლენას შემდგომში სიმღერაც მიუძღვნა.
|
Pm ( 
სულ: 756 
თვის განმავლობაში: 0 
საიტის ადმინი: 4 
სერვერის ადმინი: 3
მოდერები: 8
მომხმარებელი: 0 
მნახველი: 737 
ქალი: 653